Après eras 6aus Jornadas Occitanas de Montrejau
Eth arrencontre deth atletism, dera caminada pera natura e dera cultura occitana
Enguan, eras Jornadas Occitanas Passa-Pòrts, organizadas deth 28
de març ath 4 d’abriu peth Ostau Comengés
qu’an encara sedusit un public nombrós e variat :
musicaires, dançaires, cantaires, esportius, caminaires,
productors locaus e un nombre impressionant de joesis !
Era corsa a pè Era Hlama Occitana
Eth 28 de març qu’èra organizada era 5au edicion
dera corsa a pè Era Hlama Occitana, en partenariat en ame eth
ACM Running Club. Aquera corsa entram Montrejau, Aventinhan e Cuguron
qu’amassèc 90 correires que huren atau sensibilizats ara
cultura occitana : drapèus occitans, animacion bilingüa ath
micrò, musica e cants occitans ath depart e ara arribada
gràcia ara participacion deth grop vocau Era Çarnalha e
deth duò Darmani-Rachou cargats d’animar eth centre dera
ciutat.
Era Jornada deths Gafets
Eth divendres 3 d’abriu, 450 escolans vengudis de 12
escòlas e de 7 collègis e licèus comengeses que
participèren ara 3au Jornada deths Gafets. Ath programa : conde,
teatre e cant en occitan e un gran bal tradicionau animat peths
conselhèrs pedagogics que, dempuish seteme, intervenguen
enà ajudar dròlles e arregents a aprestar un
arrepertòri comun de danças cantadas. A notar eth
estrambòrd deths gafets pendent eras danças e era
suá bona tenguda tota era jornada.
Era projeccion deth film Eths Erbejaires
Ath ser, que i avec tanben era presentacion deth documentari Eths
Erbejaires, produsit peth Ostau Comengés. Aqueth document,
filmat ena vath deth Arbàs en cadre de uá operacion
destinada a cuélher era cultura orala dera Gasconha,
qu’ensenha se quin eths païsans pirenencs erbejavan
d’autis còps e que les balha era paraula en occitan. 70
personas qu’assistiren ara projeccion que huc seguida d’un
escambi en ame eth public e que s’acabèc en cançon,
en ame Era Çarnalha.
Eths estagis de musica e de dança e era caminada
Eth dissabde 4 d’abriu, de 10 oras a 17 oras, Eth Ostau
Comengés qu’organizava tanben estagis d’acordeon
diatonic, de clarin, de violon e de danças cantadas. 38
estagiaris que seguiren aqueris talhèrs.
Era vrespada, era caminada Caminem per Òc organizada en
collaboracion en ame era associacion Eco-rando qu’amassèc
80 personas per un circuït de 9,7 qm ath torn de Montrejau.
Pendent era travessada dera vila, eths musicaires Zinga-Zanga que les
acompanhèren abans d’animar eras carrèras.
Eth gran bal en ame Zinga-Zanga, Tralala et Coriandre
Après un bon sopar a basa de produïts deth terrador, era
serada que comencèc de cap a 21 oras, en ame Zinga-Zanga e,
còp-sec, eths dançaires qu’entrèren en
accion, ath son deth acordeon, deth graile, deras bodegas e deras
percussions. Après, eth triò Tralala que pugèc sus
eth empont e qu’entamièc un bal ara votz aths accents
lengadocians.
Enfin, Coriandre que botèc eth huec ena sala deras
Hèstas, eth temps d’un bal on eths instruments
tradicionaus s’abarregèren aths coires, aras guitarras e
ara bateria – sense desbrembar eras paraulas, en occitan plan
segur – nath plaser deths dançaires vengudis deths
quate cantons d’Occitània.
