Gascon, parla ta lenga Se voletz arrecéber era nòsta letra d'informacion cada mes que mos podetz contactar ad aquera adreça : ostaucomenges@orange.fr PASSA-PÒRTS  19 e 20 de març de 2010 Jornadas Occitanas de Montrejau Eth programa 25 000 personas a Carcassona nà manifestar en favor deth occitan Après era escajuda deras manifestacions de 2005 e 2007, eths organizators que’s demandavan se i anava aver autant de monde aqueste còp. E ben que i avec finalament encara mès de monde ! Demèst eths participants que i aviá gents de cada canton d’Occitània – Eth Ostau Comengés, coma eras annadas passadas, qu’aviá organizat un desplaçament en autocar dempuish Sent Gaudenç, en ame un cinquantenat de personas daguens – mès tanben de Catalonha, de Bretanha… Totas eras generacions qu’èran arrepresentadas peth passacarrèra que haiá 2 km de long. A travès aquera jornada colorada e conviviala, eth pòple occitan qu’exprimèc era sua determinacion a obténguer mès d’arreconeishença e mès d’ajuda dera part deth Estat ath nivèu deth ensenhament, deths mediàs, dera creacion artistica e ena vita publica en generau. Ja saberam lèu s’eth governament qu’a promés ua lei sus eras lengas arregionalas a entenut eth messatge. ENCAUSSA (31) 130 personas a Encaussa entara serada occitana ! Que i aviá longtemps qu’era municipalitat d’Encaussa voliá organizar ua serada occitana. E ben ara qu’é hèt e quina serada ! Eth 23 d’octobre, 130 personas de totas eras generacions, vengudas dera comuna e deth canton d’Aspèth, qu’èran presentas ena sala deras hèstas. Era serada que comencèc en ame era projeccion deths Erbejaires, documentari en occitan, produït peth Ostau Comengés e filmat ena vath deth Arbàs on s’i ved a erbejar coma deth temps vielh, ara dalha e en ame un parelh de buòus que tiran era liá. Eths escolans de 6au e de 5au deth collègi d’Aspèth qu’interpretèren cançons en occitan e que dancèren. Eth poèta Fabrice Lacroix que ligec tanben poèmas sòns. Que i aviá huec ena shumenèia, pastèras, citra e sustot ua grana calor umana ena sala dera hèstas deth vilatge. Aquera prumèra serada occitana qu’é incontestablament ua escajuda que n’aperarà d’autas. Qu’é possible de procurà’s eths DVD de Pelòt (10 €) e deths Erbejaires (15 €) auprès deth Ostau Comengés : ostaucomenges@orange.fr  HERRAN (31) Eth Ostau Comengés que filma pera nauta vath deth Arbàs Après era sortida d’un prumèr DVD titolat Eths Erbejaires qu’ensenha se quin haián era èrba d’autis còps en Comenge, era association Eth Ostau Comengés que perseguish eras suas activitats d’arrecèrca sus era cultura orala. Eths 21 e 22 de juilhet, ua còlha que passèc dus diás a filmar pera montanha nà produsir un aute documentari consacrat aras activitats umanas en massís de Palomèra : pastoralism, produccion de carbon, caça, utilisacion dera glaça… Matiu Faure (EOC), Claude Barés, Silvan Carrèra (Nosauts de Bigòrra) per dejós eth Tuc de Cornudèra Aqueth film, realisat en partenariat en ame era associacion Nosauts de Bigòrra, que serà tanben era ocasion de prénguer consciéncia dera extraordenària arriquessa deths noms de lòcs. Se noms coma Palomèra, Cornudèra o encara Era Hont deth Os son plan coneguts peth monde deth país o peths toristas, d’autis no’n son cap tant : Eras Planèras, Eths Clòts dera Glèisa, Era Hont dera Arroqueta, Era Pala deth Tòch… Era sortida dth film qu’é prevista ath printemps de 2010 En tot demorar, qu’é tostemps possible de crompar eth DVD Eths Erbejaires en tot contactar era associacion. Filmat ena Vath deth Arbàs, en partenariat dab Nosauts de Bigòrra e Mémoire de l’Arbas, aqueth document de 23 mn qu’ensenha se quin eths païsans pirenencs erbejavan d’autis còps e que les balha era paraula en gascon (sos-titolatge en francés). Dab era participacion de Bertrand Abéjean, Claude Barés, Pierre Bonzom, Yvonne Castex, André Cucuron, Roger Daffis, Roger Daure, Romain Ferran, Bertrand Ribet e Jean Treich. Prètz : 15 € (chèc ath òrde deth Ostau Comengés) + 2,30 € de pòrt A comandar a Joan Pau Ferré 09160 Bèth-Hag / Betchat o ostaucomenges@orange.fr